首页 > 名报 > 太阳报

般茅半場頂得住曼城

2019-08-25 10:09:31

地頭迎Big 6例精神
周日晚上英超早場,般尼茅夫主場挑戰「藍月亮」曼城。衞冕之師曼城今季第2場聯賽就失分,為免畀爭標對手拋離呢場不容再失,不過般茅一向遇強愈強,尤其喺佢哋地頭活力球場,迎戰Big 6球隊格外精神,上半場有氣有力時多數不落下風,呢場起碼可以頂到半場不敗,一於吼實半場和。

(Now 611及621周日晚上9時直播)

曼城上季以38場聯賽豪取32勝嘅強者姿態勇奪英超冠軍,只有6場聯賽未能全取3分,勢估唔到今季嚟到第2輪已經甩轆,上仗2比2遭熱刺逼和失分,「藍月亮」繼上屆歐聯8強次回合後,再一次喺補時階段入波畀VAR系統推翻,主帥哥迪奧拿同一班球員谷埋一肚火,為免有機會畀頭2戰全勝嘅利物浦、阿仙奴等拉開距離,曼城呢場勢以3分為目標,唔會容許再有任何閃失。

上季主場
僅輸0比1
雖然曼城爭勝決心毋庸置疑,不過般尼茅夫亦非善類,上仗作客2比1擊敗阿士東維拉打開勝利之門,英超開咧2戰取1勝1和,戰績同曼城睇齊,而且般尼茅夫上季聯賽主場對Big 6取得2勝4負,當中5次上半場成功逼和對手,可見球員喺體力下降之前,絕對有實力同強敵周旋,況且般尼茅夫上季主場鬥曼城僅以0比1告負,有往績可尋,呢場客勝賠率太熱,寧願改捧半場和。